වී කුරුළු වළප

ඔබේ පොඩි පැල්පතේ 
ඉස්සරහ බිත්තියේ හරි මැදට 
ගසා ලොකු ඇණයක් තදට 
මුහුණ ලා පළා පැහැ කුඹුරට 
තනාදුන් කූඩුව සීරුවට 
එපා දැන් මට 

සුදෙන් පිරියම් කොට 
ඇතුල්වීමේ දොරටු හිල්කොට 
පිදුරු අතුරා ඇතුළට 
උණුසුමට ගුලිවෙලා ඉන්නට 
ඔබ තනා දුන් කූඩුව 
එපා දැන් මට 

දවස කුඹුරේම දියකොට 
දහදියෙන් දිය බැඳි ඔබට 
රන් පැහැ වී කරල් 
මෙහෙම ඔච්චම් කරනකොට 
ඔබේ දෙනෙතින් වෑහෙන 
මරණීය කඳුළු කැට 
තවත්නම් බැහැ මට 
මෙතන ඉඳගෙන බලා ඉන්නට 

වී කුරුල්ලෙක් වුව 
නිකං ඉඳගෙන පිනට 
නොකමි වී නම් මින් මනත්තට 
සරු වූ විටක අත මිට 
ඉහළම මිලක් දෙන්නට 
ඔබේ ඔය වී කඳුලට 
යළිත් එන්නම් විගහට 
ඔබත් සමගින් කල් අරින්නට.......